बेळगाव-belgavkar : परिवहनच्या बसमधील सीटवर बसण्यावरून झालेल्या वादावादीनंतर एका महाविद्यालयीन विद्यार्थिनीला तिघा जणांनी शिविगाळ करण्यासह मारहाण केल्याची घटना सोमवारी सायंकाळी 7.15 च्या सुमारास मध्यवर्ती बसस्थानकावर घडली आहे. याप्रकरणी कौशल्या महालिंगप्पा यळवत्ती (वय 21, रा. बम्मीगट्टी, ता. कलघटगी, जि. धारवाड) हिने दिलेल्या फिर्यादीवरून पोलिसांनी मोहम्मदअजिम सवनूर, शहनाज सवनूर आणि करिष्मा सवनूर (तिघेही रा. हुबळी) यांच्याविरोधात गुन्हा दाखल करून घेतला आहे.
याबाबत पोलिसांतून समजलेली अधिक माहिती अशी, फिर्यादी कौशल्या ही राणी चन्नम्मा विद्यापीठात शिकत आहे. त्यामुळे ती दररोज परिवहनच्या बसमधून बेळगावला ये-जा करत होती. सोमवारी सायंकाळी 7.15 च्या दरम्यान ती आपली मैत्रीण अक्षता (रा. धारवाड) आणि वर्षा (रा. धारवाड) या दोघांसमवेत कॉलेज संपवून आपापल्या गावी जाण्यासाठी मध्यवर्ती बसस्थानकावर आले. बेळगावहून धारवाड मार्गे बळ्ळारीला जाणारी बस येताच कौशल्या बसमध्ये चढली व सीटवर जाऊन बसली.
सदर सीटवर आधीच काहींनी एका ठिकाणी पाण्याची बॉटल तर दुसऱ्या सीटवर पिशवी ठेवली होती. त्यामुळे कौशल्या रिकाम्या असलेल्या तिसऱ्या सीटवर बसली. काही वेळानंतर एक महिला त्याठिकाणी आली आणि आम्ही तिघेजण आहे. त्यामुळे तू येथून उठ असे सांगितले. त्यावर मी तुमच्यासाठी दोन सीट सोडल्या आहेत. त्याठिकाणी तुम्ही बसा, असे सांगितल्यानंतर त्याठिकाणी थांबलेल्या दोघी महिलांसह एका पुरुषाने कौशल्याबरोबर भांडण काढून शिविगाळ करत मारहाण केली. तसेच जीवे मारण्याची धमकीही दिली. यामध्ये कौशल्याच्या मोबाईलचे नुकसान झाले असून तिने दिलेल्या फिर्यादीवरून गुन्हा दाखल करून घेऊन पोलिसांनी तपास चालविला आहे.
