बेळगाव : शहापूर येथील छत्रपती शिवाजी महाराज उद्यानाजवळ उभारण्यात आलेल्या शिवसृष्ठीचे गुरुवारी (दि. 16) सायंकाळी 5.30 वाजता केंद्रीय मंत्री स्मृती इराणी यांच्याहस्ते लोकार्पण होणार आहे, अशी माहिती आमदार अभय पाटील यांनी दिली. अनगोळमधील धर्मवीर संभाजी महाराज चौकात 22 मार्चला धर्मवीर संभाजी महाराजांची भव्य मूर्तीही उभारण्यात येणार आहे.
गोवावेस बसवेश्वर चौकात बसवेश्वरांच्या पुतळ्याची पुनर्प्रतिष्ठापना करण्यात येणार आहे. याठिकाणी 1 एकर जागेत अनुभव मंटपाच्या प्रतिकृतीसाठी सुमारे 4 ते 5 कोटीपर्यंत खर्च येणार आहे. 15 मार्च रोजी सकाळी 10.30 वाजता मुख्यमंत्री बसवराज बोम्मई यांच्याहस्ते या प्रकल्पाची कोनशिला बसविण्यात येणार आहे. बसवेश्वर पुतळा भूमीपूजन व अन्य विकासकामांचे उदघाटन मुख्यमंत्री करणार आहेत. त्याचप्रमाणे अनगोळ येथील आंबेडकर तलावाच्या काठावर डॉ. बाबासाहेब आंबेडकर, क्रांतिवीर संगोळी रायण्णा यांचे पुतळे उभारण्यात येणार आहेत.