बेळगाव : बंगळूर, तिरुपती, नागपूर विमानसेवा बंद

बेळगाव—belgavkar—belgaum : सांबरा विमानतळावरील विमान वाहतुकीत महत्वाची भूमिका बजावणाऱ्या स्टार एअर कंपनीने बेळगावहून 3 प्रमुख मार्गांसाठीचे तिकीट बुकिंग येत्या एप्रिलपासून थांबविले आहे. त्यात बेळगाव-तिरुपती, बेळगाव-नागपूर आणि बेळगाव-बंगळूर या सेवेचा समावेश आहे.

विमान प्रवाशांची वाढती मागणी असताना या मार्गांचे बुकिंग थांबविण्याच्या निर्णयामुळे वारंवार प्रवास करणाऱ्या प्रवाशांमध्ये नाराजी व्यक्त होत आहे. यापूर्वी स्टार एअरने बेळगाव-जोधपूर, बेळगाव इंदूर, बेळगाव-सुरत आणि बेळगाव-नाशिक या मार्गांवरील उड्डाणे मागे घेतली होती. आता आणखी काही मार्गांवरील सेवा बंद केल्याने स्टार एअरची बेळगावमधील सेवा आणखी कमी झाली आहे.

आता फक्त बेळगाव-मुंबई (रोज), बेळगाव-अहमदाबाद (सोमवार, बुधवार, शुक्रवार आणि शनिवार), बेळगाव-जयपूर (रविवार, सोमवार आणि गुरुवार) या सेवा कार्यरत आहेत. गेल्या पाच वर्षांत मंजूर मार्गांच्या पलीकडे विस्तार करण्यात अपयशी ठरल्याबद्दल आणि बेळगावपासून कनेक्टिव्हिटी मर्यादित केल्याबद्दल अनेक ग्राहकांनी स्टार एअरच्या सेवेबाबत नाराजी व्यक्त केली आहे.