बेळगाव—belgavkar—belgaum : सासरच्या जाचाला कंटाळून आत्महत्येचा प्रयत्न करणाऱ्या विवाहितेच्या प्रकरणाला कलाटणी मिळाली आहे. तिच्या सासऱ्यांनी कॅम्प पोलीस स्थानकात भाजप नेत्यासह तिघा जणांविरुद्ध फिर्याद दिली आहे. त्यामुळे एकच खळबळ माजली आहे. कन्विका गणेश गोड्याळकर (वय 20, रा. भडकल गल्ली) या विवाहितेने सोमवारी 15 जुलै रोजी भडकल गल्ली येथील तिच्या माहेरी आत्महत्येचा प्रयत्न केला.
इंजिनीयर पती, सासू-सासऱ्यांसह सासरच्या जाचाला कंटाळून आपण हे पाऊल उचलल्याचे तिने सांगितले होते. तिला उपचारासाठी सिव्हिल हॉस्पिटलमध्ये दाखल करण्यात आले आहे. कन्विकाने यापूर्वी सासरच्या मंडळींविरुद्ध पोलीस आयुक्त व उपायुक्तांकडेही तक्रार केली होती. आता तिचे सासरे तम्मण्णा हणमंत गोड्याळकर (वय 61, रा. सरस्वतीनगर, गणेशपूर) यांनी सामाजिक कार्यकर्ते आणि भाजपचे नेते पृथ्वी सिंग, कन्विकासह आणखी एकावर फिर्याद दिली आहे.
दि. 27 मे रोजी रात्री सासरच्या मंडळींनी मारहाण करून आपल्याला घराबाहेर काढल्याचा आरोप कन्विकाने केला होता. मात्र, तम्मण्णा यांनी दिलेल्या फिर्यादीनुसार पृथ्वी सिंग व इतरांनी घरांत बेकायदा प्रवेश करून कन्विकाला का त्रास करता? तिला घरी ठेवला नाही तर तुम्हाला सोडणार नाही, असे धमकावल्याचे फिर्यादीत म्हटले आहे.