नवी दिल्ली : कर्नाटक भाजपनं काँग्रेसविरोधात केलेली आक्षेपार्ह पोस्ट तातडीनं हटवण्याचे आदेश निवडणूक आयोगानं ट्विटरला दिले आहेत. याप्रकरणी आयोगानं अधिकृत पत्रही पाठवलं आहे. तसेच या प्रकरणात एफआयआरही दाखल करण्यात आला आहे.
कर्नाटक भाजपनं 4 मे रोजी एक अॅनिमेटेड व्हिडिओ पोस्ट केला होता. यामध्ये काँग्रेस नेते राहुल गांधी, कर्नाटकचे मुख्यमंत्री सिद्धरामय्या यांच्यावर आरक्षणाच्या मुद्द्यावरुन निशाणा बनवण्यात आलं होतं. या 17 सेकंदाच्या क्लीपमध्ये कन्नड भाषेत सावध राहा, सावध राहा, सावध राहा असा इशारा देण्यात आला होता.
या व्हिडिओवर काँग्रेसनं आक्षेप घेत 5 मे रोजी निवडणूक आयोगाकडं तक्रार दाखल केली होती. यामध्ये काँग्रेसनं आरोप केला होता की, भाजपनं याद्वारे दंगलीला आणि शत्रुत्वाला चिथावणी दिली आहे. काँग्रेसच्या या तक्रारीनंतर मुख्य निवडणूक अधिकाऱ्यांनी भाजपला निर्देश दिले की त्यांनी आपल्या ट्विटर हँडलवरुन ती पोस्ट हटवावी. पण आदेश देऊनही भाजपनं तो व्हिडिओ हटवलेला नाही.
या घटनेनंतर बंगळुरु पोलिसांनी भाजपचे राष्ट्रीय अध्यक्ष जेपी नड्डा, भाजपचे आयटी सेलचे प्रमुख अमित मालवीय आणि प्रदेशाध्यक्ष बीवाय विजयेंद्र यांच्याविरोधात गुन्हा दाखल केला आहे. भादंवि कलम 125 आणि 505 (2) अंतर्गत हे गुन्हे दाखल करण्यात आले आहेत.