बेळगाव : विधानसभा निवडणुकीत महाराष्ट्र एकीकरण समितीचा प्रचार करण्याची माझी इच्छा आहे. पण युती सरकार असल्यामुळे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याशी चर्चा करून गुरुवारी निर्णय घेण्यात येईल, अशी ग्वाही महाराष्ट्राचे सीमा समन्वय मंत्री शंभुराज देसाई यांनी दिली. मध्यवर्ती महाराष्ट्र एकीकरण समितीच्या शिष्टमंडळाने सीमाभागात म. ए. समिती उमेदवारांच्या प्रचारासाठी महाराष्ट्रातील नेत्यांनी यावे, यासाठी नेत्यांच्या भेटीगाठी सुरू केल्या आहेत.
रविवारी शिष्टमंडळाने पाटण येथे मंत्रीदेसाई यांची भेट घेतली. त्यावेळी सीमाभागातीलप्रत्येक मतदार संघात एकेकच उमेदवार देण्यात आलेला आहे. त्यामुळे महाराष्ट्रातील नेत्यांनी प्रचाराला यावे, अशी विनंती केली. त्यावर आपण प्रचारासाठी येण्यास तयार आहे. पण, याचा निर्णय मुख्यमंत्री शिंदे आणि उपमुख्यमंत्री फडणवीस यांना विचारून घ्यावा लागणार आहे. आपण याबाबत चर्चा करणार असून गुरुवारी निर्णय घेण्यात येईल, असे सांगितले. शिष्टमंडळात कार्याध्यक्ष, माजी आमदार मनोहर किणेकर, प्रकाश मरगाळे, अॅड. एम. जी. पाटील, विनोद आंबेवाडीकर यांचा समावेश आहे. हे शिष्टमंडळ महाराष्ट्रातील अन्य नेत्यांनाही भेटणार आहे.