बेळगाव : बेळगाव महापालिकेत पुन्हा मराठीची गळचेपी करण्यात आली. आजपर्यंतच्या इतिहासात त्रिभाषा धोरणाचा अवलंब करत आलेल्या महापालिकेत केवळ कन्नड भाषेतीलच अर्थसंकल्प नगरसेवकांना देण्यात आला. त्यावर म. ए. समिती नगरसेवकांनी आक्षेप घेत आक्रमकपणे मराठीतील अर्थसंकल्पाची मागणी केली. संतापलेले म. ए. समिती नगसेवक रवी साळुंखे आणि शिवाजी मंडोळकर यांनी सभागृहात मराठीतून अर्थसंकल्प का देण्यात आला नाही. आम्हाला कन्नड समजत नाही. त्यामुळे मराठी आणि इंग्रजीतून अर्थसंकल्प देण्याची मागणी केली.
यावेळी आमदार अनिल बेनके यांनी अर्थसंकल्पावर मनोगत व्यक्त केले. त्यानंतर सत्ताधारी गटातील काही नगरसेवकांनीही मराठी अर्थसंकल्पाचा मुद्दा टाळून मनोगत व्यक्त केले. पण, त्यानंतरही नगरसेवक साळुंखे आणि मंडोळकर यांनी मराठी भाषेतून अर्थसंकल्पाचा मुद्दा लावून धरला. त्यामुळे सभागृहात काही काळ वाद निर्माण झाला होता. पण, महापौर शोभा सोमनाचे यांनी अर्थसंकल्प तयार झाल्यानंतर मराठी आणि इंग्रजीमधून देऊ, असे सांगून विषय संपवला. त्यावर नगरसेवकांना शपथ देताना मराठी, कन्नड आणि इंग्रजीची मुभा देण्यात येते आणि आता मात्र मराठीवर अन्याय का करण्यात येतोय, असा सवाल साळुंखे यांनी उपस्थित केला.
