ट्रॅक्टरमधून पडून मुलगा जागीच ठारबेळगाव : हुक्केरी तालुक्यातील व्हनेहळ्ळीनजीक नवीन ट्रॅक्टरमधून खड्यात पडल्याने दिवाळीसाठी मामाच्या गावी आलेला मुलगा ठार झाला. बुधवारी (18 नोव्हेंबर) दुपारी 12 वाजण्याच्या सुमारास हा अपघात घडला. सुमेद संजय जैनापुरे (वय 13, रा. गव्हाण, ता. निपाणी) असे मृत मुलाचे नाव आहे. संकेश्वर पोलिस ठाण्यात अपघाताची नोंद झाली आहे. याबाबत पोलिसांतून मिळालेली माहिती अशी, सुमेद दीपावलीनिमित्त मामाच्या गावी व्हनेहळ्ळी (ता. हुक्केरी) येथे जयकुमार मल्लाप्पा लब्बी यांच्याकडे आला होता. तेथे नवीन ट्रॅक्टरमध्ये बसून जात असताना तोल जाऊन खड्ड्यात पडल्याने सुमेदचा जागीच मृत्यू झाला. ऐन दीपावली सणात हा अपघात घडल्याने परिसरातून हळहळ व्यक्त होत आहे.
गटारीत पडून युवकाचा मृत्यूगटारीत पडून माळमारुती येथील एका युवकाचा मृत्यू झाला. बुधवारी सकाळी बेळगाव शहरातील श्रीनगर परिसरात ही घटना घडली असून माळमारुती पोलीस स्थानकात या घटनेची नोंद झाली आहे. अभिनंदन सावंत चौगुला (वय 39, रा. माळमारुती) असे त्या युवकाचे नाव आहे. बुधवारी सकाळी 8.45 वाजण्याच्या सुमारास लव्हडेल स्कूलजवळील एका डॉक्टराच्या घरासमोर गटारीत त्याचा मृतदेह आढळून आला आहे. सिव्हिल हॉस्पिटलमधील शवागारात उत्तरीय तपासणी करून मृतदेह नातेवाईकांच्या ताब्यात देण्यात आला. नशेत गटारीत पडल्याने त्याचा मृत्यू झाला असावा, असे पोलिसांनी सांगितले. माळमारुतीचे पोलीस निरीक्षक बी. आर. गड्डेकर पुढील तपास करीत आहेत.
