बेळगाव—belgavkar—belgaum : कर्नाटक राज्य सरकारने नवीन उद्योगाला प्रोत्साहन देण्यासाठी आणि वाढवण्यासाठी स्टार्टअप पार्क उभारण्याचा निर्णय घेतला आहे. बंगळूर आणि बेळगाव येथे दोन स्वतंत्र स्टार्टअप पार्क उभारण्यात येणार असल्याची माहिती अवजड उद्योगमंत्री एम. बी. पाटील यांनी दिली. बेळगावात मेड-टेक स्टार्टअप पार्क स्थापन करण्याचा मानस असल्याचे सांगितले.
भारतीय उद्योग संघटना (सीआयआय) यांच्या वतीने आयोजित 'इनोव्हर्ज' परिषदेत ते बोलत होते. ते म्हणाले, राज्य सरकार उद्योग, संशोधन, विकास आणि तंत्रज्ञानाच्या बाबतीत अनुकूल आहे. स्टार्टअप पार्कसाठी आवश्यक असलेल्या जागेची पाहणी यापूर्वीच बंगळूरमध्ये केली आहे. बेळगावात योग्य जागा शोधण्याच्या सूचना अधिकाऱ्यांना दिल्या आहेत. कर्नाटक हे विज्ञान आणि तंत्रज्ञान तसेच संशोधन आणि विकासाचे केंद्र आहे. यासोबतच आपल्याला कुशल मनुष्यबळ निर्माण करण्याची गरज आहे. तरच त्याचा राज्याला फायदा होईल.
उत्पादन क्षेत्रात राबविण्यात आलेली योग्य धोरणे आणि प्रोत्साहनांमुळे राज्यात मोठ्या प्रमाणात उद्योजक आकर्षित होत आहेत. राज्यात चौथी औद्योगिक क्रांती साध्य करण्याचे ध्येय आहे. राज्यातील नवीन औद्योगिक क्षेत्रांच्या विकासासाठी आणि सध्याच्या उद्योगांना नदी स्रोतांपासून स्वतंत्र पाणीपुरवठा करण्यासह पायाभूत सुविधा उपलब्ध करून देण्यासाठी 5 हजार कोटींचे कर्ज मिळवून देण्याचे प्रयत्न सुरू आहेत.
राज्यातील बहुतांश औद्योगिक क्षेत्रात अपेक्षित पायाभूत सुविधांचा अभाव आहे. स्वतंत्र पाणीपुरवठा व्यवस्था नाही. त्यामुळे या दृष्टीने प्रयत्न सुरू आहेत. याबाबत वित्त विभागाशी चर्चा सुरू असल्याचे त्यांनी सांगितले. प्रस्तावित पाणीपुरवठा प्रकल्पासाठी दोन हजार कोटी रुपयांचा खर्च अपेक्षित आहे. उर्वरित तीन हजार कोटी जुन्या औद्योगिक क्षेत्रातील पायाभूत सुविधांच्या विकासासाठी आणि नवीन औद्योगिक क्षेत्रांच्या विकासासाठी आणि भूसंपादनासाठी वापरण्यात येणार आहे.