कोल्हापूरची जीवनवाहिनी असलेलं राधानगरी धरण 100 टक्के भरलं आहे. आज सकाळी दहाच्या सुमारास सहाव्या क्रमांकाचा स्वयंचलित दरवाजा उघडला. त्यानंतर काही वेळातच 3, 4 आणि 5 नंबरचा स्वयंचलित दरवाजा उघडला. राधानगरी धरणातून भोगावती नदीपात्रात 7212 ने विसर्ग सुरु आहे.
धरणाचे दरवाजे उघडल्याने नदीच्या पाणीपात्रात वाढ होणार आहे. कोल्हापूर पंचगंगा नदीची पाणी पातळी 43 फुट 1 इंचावर पोहोचली आहे. कोल्हापुरात पावसाची उघडझाप सुरु असली, तरी धरण क्षेत्रात जोरदार पाऊस सुरु आहे. त्यामुळे नद्यांना पूरसदृश्य परिस्थिती निर्माण झाली आहे. जिल्ह्यातील 81 बंधारे पाण्याखाली गेले आहेत. बंधारे बंद असल्याने अनेक गावांशी थेट संपर्क तुटला असून काही गावांना बेटाचे स्वरुप प्राप्त झालं आहे.
कोल्हापूर जिल्ह्यात धुवाधार पावसामुळे पूरपरिस्थिती निर्माण झाली आहे. अनेक मार्ग पाण्याखाली गेल्याने वाहतूक ठप्प झाली आहे. धरणपाणलोट क्षेत्रात जोरदार पाऊस असल्याने राधानगरी, काळम्मावाडी, वारणा धरण पाणीपातळीत वाढ होत असून धरणातून विसर्ग सुरु करण्यात आले आहेत. यामुळे नद्यांच्या पाणीपातळीत वाढ होत आहे.