बेळगाव—belgavkar : बंद घर फोडून दोन लाखांची चोरी झाल्याची घटना बुधवारी सकाळी सावगावमध्ये (ता. बेळगाव) उघडकीस आली. याप्रकरणी विशाल मारुती डेंगोळे (रा. जनता कॉलनी, सावगाव) यांनी फिर्याद दिली आहे. याबाबत पोलिसांनी दिलेली अधिक माहिती अशी, डेंगोळे यांचे जुने व नवे अशी दोन घरे आहेत. दोन दिवसांपूर्वी घरात दुःखद घटना घडल्यामुळे ते जुने घर बंद करुन कुटुंबियांसह नवीन घराकडे वास्तव्यास गेले होते.

मंगळवारी रात्री ते बुधवारी पहाटेच्या सुमारास चोरट्यांनी घराचे समोरील कुलूप तोडून आत प्रवेश केला. कपाटातील अडीच तोळ्यांचे सोन्याचे दागिने, चांदीच्या वस्तू व आठ हजाराची रोख रक्कम असा सुमारे दोन लाखांचा ऐवज चोरट्यांनी पळवून नेला. बुधवारी सकाळी घरी आल्यानंतर हा प्रकार उघडकीस आला.

ही माहिती वडगाव ग्रामीण पोलिसांना दिल्यानंतर त्यांनी घटनास्थळी भेट देऊन पंचनामा केला. श्वानपथक व ठसेतज्ज्ञांना पाचारण करण्यात आले होते. परंतु, चोरट्यांचा माग निघाला नाही. पोलिस निरीक्षक नचिकेत जनगौडा अधिक तपास करीत आहेत.