पौगंडावस्थेतील विद्यार्थ्यांना हाताळणं हे शिक्षकांसाठी किती कठीण असतं हे आजवर अनेक व्हिडीओजमधून आपण पाहिलेलं आहे. मात्र आता एक असा व्हिडीओ व्हायरल होत आहे ज्यात तुम्हाला एकाच वेळी विद्यार्थ्यांची चीड व शिक्षिकेचा अभिमान वाटेल. अलीकडेच वैद्यकीय शिक्षण घेणाऱ्या काही विद्यार्थ्यांनी ऑनलाईन वर्गादरम्यान शिक्षिकेला अश्लील पद्धतीने प्रश्न विचारून चिडवण्याचा प्रयत्न केला पण या शिक्षिकेने निर्भीडपणे व विशेषतः गोंधळून न जाता या विद्यार्थ्यांचा खरपूस समाचार घेतला. या शिक्षिकेने सदर प्रकार स्वतः आपल्या इंस्टाग्राम चॅनेलवर शेअर केला आहे. तसेच अन्य शिक्षिकांना सुद्धा अशा स्थितीत निराश न होता स्वतःचा मान राखायला विसरू नका असे आवाहन केले आहे. नेमका हा प्रकार काय होता हे पाहूया..

काही विद्यार्थी ऑनलाइन क्लासेसदरम्यान अश्लील कमेंट करताना दिसतात. अनेकवेळा शिक्षक दुर्लक्ष करत असले तरी महिलांबद्दल असभ्य बोलण्याचा प्रयत्न करणाऱ्या विद्यार्थ्याला यावेळी एका महिला शिक्षिकेने सडेतोड उत्तर दिले आहे.

वास्तविक, NEET-UG विद्यार्थ्यांसाठी यूट्यूब चॅनल चालवणाऱ्या रक्षिता सिंह यांच्या जीवशास्त्र धड्याच्या व्हिडिओवर एका विद्यार्थ्याने अश्लील टिप्पणी केली.

विद्यार्थ्याने लिहिले, 'मुलाचा जन्म कसा होतो हे प्रत्यक्षपणे दाखवा.' या असभ्य कमेंटला शिक्षिका रक्षिताने चोख प्रत्युत्तर दिले. त्याचा हा व्हिडिओ सोशल मीडियावर मोठ्या प्रमाणात व्हायरल होत आहे.

यानंतर शिक्षिका रक्षिता व्हिडिओमध्ये बोलताना दिसत आहे : “एका विद्यार्थ्याने विचारले, मूल कसे जन्माला येते मॅडम, मला प्रत्यक्षपणे दाखवा. यावर शिक्षिका रक्षिता म्हणाल्या, हे आईला सांग, आईने केले आहे... बेटा, मी अविवाहित आहे. मला प्रत्यक्षिक ज्ञान नाही. तू लहान आहेस, मी तुझ्यापेक्षा चार-पाच वर्षांनी मोठी आहे. लवकरच माझे एमबीबीएस पूर्ण होणार आहे. तुझ्या NEET च्या आधी मी प्रॅक्टिसिंग डॉक्टर असेन. मी असे कोणतेही प्रश्न स्वीकारणार नाही.”

रक्षिता यांनी हा व्हिडिओ शेअर करत लिहिले, मी 4 वर्षांपूर्वी शिकवायला सुरुवात केली आणि माझ्या सुरुवातीच्या दिवसांमध्ये मी सकाळी 6 वाजता क्लास घेत होते. एका मुलाने अश्लील कमेंट केली. ह्याची मला थोडी काळजी वाटू लागली. यानंतर मी रडू लागले. मी पुढचे क्लास घेण्याचे धाडस करू शकले नाही आणि क्लास रद्द केला. मी त्याला समजावण्याचा प्रयत्न केला की हा लाइव्ह क्लास आहे, पण तो स्पॅम करत राहिला...! एक शिक्षक या नात्याने मला नेहमीच असे वाटते की केवळ शिकवणेच नाही तर त्यांना एक चांगली व्यक्ती बनण्यास मदत करणे ही माझी जबाबदारी आहे, असे रक्षिता पुढे म्हणाल्या जेव्हा अनेक स्पॅमर्स येतात, तेव्हा मी सहसा प्रेमाने समजावून सांगते, परंतु माझ्या गेल्या 4 वर्षांच्या ऑनलाइन अनुभवानंतर, मी वैयक्तिकरित्या अशा टिप्पण्यांना सडेतोड प्रतिसाद देते. मी 23 वर्षांची आहे आणि परिपक्वतेसह जीवनात अनेक गोष्टी करते, त्यामुळे मला असे वाटते की किमान 17-18 वर्षांच्या मुलांनी कोणत्याही महिला शिक्षकांबद्दल असे बोलू नये इतके प्रौढ असावे.