बेळगाव : ऐतिहासिक कित्तूर राणी चन्नम्मा उत्सव यावर्षी दोन दिवसांचा करण्यात येणार आहे. या काळात विविध व्याख्याने तसेच स्पर्धांचे आयोजन करण्यात आले आहे. कोरोनाचे नियम पाळत हा उत्सव साजरा केला जाणार आहे. या उत्सवासाठी सरकारने ₹ 1 कोटी रुपये निधी दिला आहे. मुख्यमंत्री बसवराज बोम्मई यांच्या हस्ते या कित्तूर उत्सवाचे उदघाटन होणार असल्याची माहिती जिल्हाधिकारी एम. जी. हिरेमठ यांनी पत्रकार परिषदेत दिली.
या पत्रकार परिषदेमध्ये कित्तूरचे आमदार महांतेश दोड्डगौड, अप्पर जिल्हाधिकारी अशोक दुडगुंटी, कन्नड आणि सांस्कृतिक विभागाच्या विद्यावती बजंत्री यांच्यासह इतर अधिकारी उपस्थित होते. कित्तूर उत्सव दरवर्षी मोठ्या उत्साहात साजरा केला जातो. मात्र मागीलवर्षी कोरोनामुळे अत्यंत साध्या पद्धतीने हा उत्सव साजरा केला होता. मात्र यावर्षी दोन दिवसांचा हा उत्सव साजरा करण्याचा निर्णय घेण्यात आला. 23 ऑक्टोबर रोजी या उत्सवाचे कित्तूर येथे उदघाटन होणार आहे. तर 24 ऑक्टोबर रोजी या उत्सवाची सांगता होणार आहे. कित्तूर येथील किल्ला येथे या कार्यक्रमाचे आयोजन करण्यात आले आहे.
या उत्सवासाठी केंद्रीय मंत्री प्रल्हाद जोशी, पालकमंत्री गोविंद कारजोळ, मंत्री उमेश कत्ती, मुरगेश निराणी यांच्यासह इतर मंत्री व आमदार उपस्थित राहणार आहेत. या उत्सवानिमित्त सर्व तालुक्यांमध्ये राणी कित्तूर चन्नम्मा यांची ज्योत फिरविली जाणार आहे. सोमवार 18 रोजी त्याचे उदघाटन झाले असून आता विविध तालुक्यांना भेटी दिल्या जाणार आहेत. त्यानंतर 23 रोजी कित्तूर येथे ज्योत येणार असून ज्योत आल्यानंतर या कार्यक्रमाचे उदघाटन होणार असल्याचे सांगण्यात आले.